धादिङको न्यायिक समिति मञ्चको संयोजकमा दिपक विश्वकर्मा

काठमाडौं- जिल्ला स्तरीय न्यायिक समितिको अध्यक्षमा नीलकण्ठ नगरपालिकाका उप मेयर दिपक विश्वकर्मा चयन भएका छन् । धादिङ जिल्लाका सबै स्थानीय सरकारको न्यायिक समितिका पदाधिकारीको भेलाले विश्वकर्माको अध्यक्षतामा जिल्ला स्तरीय न्यायिक समिति मञ्चको गठन गरेको हो ।

Advertisement

सबै स्थानीय सरकारको न्यायिक समितिका संयोजकहरु सदस्य रहने गरी जिल्ला स्तरीय न्यायिक समिति मन्च गठन गरिएको छ । भेलाले जिल्ला स्थित सबै स्थानीय सरकारहरुको न्यायिक समितिबाट हुने न्यायिक निरुपणका कार्यहरुमा एकरुपता हुने गरी निर्देशिका बनाई थप व्यवस्थित गर्ने निर्णय गरेको छ ।

त्यसैगरी जिल्ला स्थित स्थानीय न्यायिक समितिहरुबाट भएका कार्य तथा असल अभ्यासको आदान प्रदान गर्ने, न्यायिक समितिबाट हुने कार्यहरुमा सहजिकरण गर्ने, जिल्लाका न्यायिक समितिका पदाधिकारीहरुको बैठक कम्तिमा २ महिनामा १ पटक बस्ने गर्ने निर्णय गरेको छ ।

भेलाले आगामी बैठकमा न्यायिक समितिबाट कार्य सम्पादन गर्दा जटिल विषय तथा असल अभ्यासहरु सम्बन्धमा सिकाई आदान प्रदान गर्ने समेत निर्णय गरेको छ ।