इरानविरुद्ध इजरायलले थाल्यो जवाफी कारबाही

जेरुसेलम– इरानले इजरायलमाथि गरेको मिसाइल र ड्रोन आक्रमणको जवाफी कारबाहीमा इरानमाथि इजरायलले मिसाइल हमला गरेको छ । अमेरिकी सञ्चारमाध्यमहरूले शीर्ष अमेरिकी अधिकारीलाई उद्धृत गर्दै यो जानकारी दिएको हुन् ।

Advertisement

इरानको विमानस्थलमा ठूलो विस्फोटको आवाज सुनिएको छ । इरानको फारस न्युज एजेन्सीले पनि इरानी सहर इसफानको विमानस्थलमा विस्फोटको आवाज सुनिएको दाबी गरेको छ । तर, विस्फोटको कारण भने खुल्न सकेको छैन । इरानका धेरै आणविक केन्द्रहरू इसफान प्रान्तमा छन् ।

इरानको युरेनियम संवर्धनको मुख्य केन्द्र पनि यही सहरमा छ । अमेरिकी सञ्चारमाध्यमका अनुसार इरानको हवाई क्षेत्रमा धेरै उडानको रुट परिवर्तन गरिएको छ ।

गएको शनिबार इरानले इजरायलमाथि ३०० भन्दा बढी मिसाइल र ड्रोन आक्रमण गरेको थियो । तर यी मिसाइल र ड्रोनले इजरायलको वायु सुरक्षालाई पार गर्न सकेनन् । अप्रिल १ मा दमास्कसस्थित इरानको दूतावासमा हमला भएको थियो । यस हमलामा इरानको सेनाका दुई शीर्ष कमाण्डरसहित सात जनाको मृत्यु भएको थियो ।