विश्व बैंकद्वारा नेपालका लागि साढे १० अर्ब ऋण सम्झौता स्वीकृत

काठमाडौं – विश्व बैंकले नेपालका लागि साढे १० अर्ब रुपैयाँभन्दा धेरैको ऋण सम्झौता स्वीकृत गरेको छ ।

Advertisement

विश्व बैंकको कार्यकारी बोर्ड बैठकले नेपालका लागि ८० मिलियन डलर अर्थात् १० अर्ब ६८ करोड ९१ लाख रुपैयाँ बराबरको ऋण स्वीकृत गरेको हो । यो ऋण नेपालको आर्थिक क्षेत्रको स्थायित्व, विविधीकरण, वित्तीय समाधान र वित्तीय सेवाहरूमा पहुँच बढाउन खर्च हुनेछ ।

विश्व बैंकले यसलाई वित्त विकास नीति ऋण भनेको छ । यसको उद्देश्य वित्तीय संस्थाको कामकाजमा सुधार ल्याउनु हो । यस सहायताले नेपालको बैंकिङ र बीमा क्षेत्रको सुपरिवेक्षणलाई सुदृढ पार्ने र पुँजी, बीमा र विपद् जोखिममा नयाँ वित्तीय उत्पादनको आविष्कारलाई बढावा दिने विश्व बैंकले जनाएको छ ।

नेपाल, श्रीलङ्का र माल्दिभ्सका लागि विश्व बैंकका देशीय निर्देशक फारिस हदाद–जेर्भोसले यस सहायताले नेपालको जलवायु एजेन्डालाई पनि समर्थन गर्ने बताएका छन् ।