सेयर बजार १६ अङ्कले बढ्दा कारोबार रकम भने घट्यो

काठमाडौं – सेयर बजार आज दोहोरो अङ्कले बढेको छ । सेयर बजार परिसूचक नेप्से आज १६ दशमलव २९ अङ्कले बढेर २ हजार ५३ दशमलव ३८ विन्दुमा पुगेको छ ।

Advertisement

आज फाइनान्स र उत्पादन बाहेक सबै समूहको सेयर बढेकोमा विकास बैंक, बीमा, होटल समूहको सेयर उच्च अङ्कले उकालो लागेको छ ।

आज हिमालयन ऊर्जा विकास कम्पनीको सेयर ९ प्रतिशतभन्दा धेरैले बढेको छ । समग्रमा बजार बढेको दिन नेपाल फाइनान्स कम्पनीको सेयर भने १० प्रतिशतले घटेको छ ।

बजार बढे पनि कारोबार रकम भने घटेको छ । हिजो साढे ३ अर्बभन्दा धेरैको कारोबार भएकोमा आज ३ सय २३ वटा कम्पनीका ७१ लाख ६५ हजार कित्ता सेयर २ अर्ब ९९ करोड रुपैयाँमा किनबेच भएको छ ।