राष्ट्रियसभा सदस्य निर्वाचन

राष्ट्रियसभा सदस्यको निर्वाचनका लागि ५२ उम्मेदवारको मनोनयनपत्र दर्ता भएको छ । आगामी माघ ११ गते हुन लागेको राष्ट्रियसभा सदस्यको निर्वाचनका लागि आज सातै प्रदेशका सम्बन्धित निर्वाचन कार्यालयमा विभिन्न समूहका ५२ उम्मेदवारको मनोनयनपत्र दर्ता भएको हो ।
कूल १९ सिटका लागि हुने निर्वाचनमा सातै प्रदेशमा महिला समूहतर्फ १७, दलित समूहतर्फ छ, अपाङ्गता भएका व्यक्ति वा अल्पसङ्ख्यक समुदायतर्फ आठ, र अन्य समूहतर्फ २१ गरी जम्मा ५२ उम्मेदवारको मनोनयनपत्र दर्ता भएको निर्वाचन आयोगले जनाएको छ ।
बागमती प्रदेशमा १५ जना, कोशी प्रदेशमा १० जना, गण्डकी प्रदेशमा ८ जना, लुम्बिनी प्रदेशमा ७ जना, कर्णाली प्रदेशमा ६ जना, सुदूरपश्चिम प्रदेशमा ६ जना गरी ५२ जना उम्मेदवारको मनोनयनपत्र दर्ता भएको छ ।
स्वीकृत निर्वाचन कार्यक्रमअनुसार यही पुस २४ गते उम्मेदवारको विरोधमा उजुरी दिने, पुस २५ र २६ गते मनोनयनपत्र र उजुरीमाथि जाँचबुझ गरी नामावली प्रकाशित गर्ने, पुस २७ गते उम्मेदवारले नाम फिर्ता लिने तथा अन्तिम नामावली प्रकाशन गर्ने र पुस २८ गते उम्मेदवारलाई निर्वाचन चिन्ह वितरण हुने कार्यसूची रहेको छ ।

Advertisement