धादिङमा निःशुल्क मुटु जाँच शिविरमा तीन सय ३४ जनाले गराए जाँच

काठमाडौं– धादिङको त्रिपुरासन्दरी गाउँपालिका–२ सल्यानटारमा भएको निःशुल्क स्वास्थ्य शिविरमा तीन सय ३४ जनाले मुटु जाँच गराएका छन् ।

Advertisement

प्राथमिक स्वास्थ्य केन्द्र सल्यानटारमा गरिएको मुटु जाँच सेवामा तीन सय ३४ जनाको मुटु जाँच गरिएकोमा एक सय ५८ जनाको ईसिजी र ३४ जनाको ईको गरिएको छ । सवैको रक्तचाप तथा सुगर परिक्षण गरि आवश्यक ओैषधि समेत निःशुल्क वितरण गरिएको छ ।

शिविरमा चितवन मुटु अस्पतालका मुटु रोग विशेषज्ञ डा. शंकर लौडारीको नेतृत्वमा उपस्थित चिकित्सक टोलीले सेवा दिएका हुन् । नेपाल हृदयरोग निवारण प्रतिष्ठान जिल्ला शाखा धादिङ तथा त्रिपुराशुन्दरी गाउँपालिकाको आयोजना, चितवन मुटु अस्पतालको प्राविधिक चिकित्सकिय सहयोग तथा नेपाल हृदयरोग निवारण प्रतिष्ठान बागमति प्रदेश समिति तथा चितवन शाखाको संयोजनमा शिविर संचालन गरिएको हो ।

मुटुरोग सम्वन्धी यस्ता निःशुल्क शिविर शहरी क्षेत्रमा मात्र हुने गरेकोले नेपाल हृदयरोग निवारण प्रतिषठान धादिङ शाखाले यस पटक ग्रामिण भेगमा संचालन गरेको हो । ग्रामिण भेगमा समेत मुटुरोगी अत्यधिक रुपमा रहेकोले नसर्ने रोग सम्वन्धी सचेतना वढाउनु पर्ने नेपाल हृदयरोग निवारण प्रतिष्ठानका केन्द्रिय सदस्य तथा धादिङ शाखाका सभापति राजकुमार श्रेष्ठले जानकारी दिए ।