किन्ताङफेदीमा चाइनिज ब्रिज निर्माण भएसँगै उत्तरी धादिङ सडक सञ्जालको सहज पहुँचमा

काठमाडौं– उत्तरी धादिङको लाइफलाइन मानिने दामन–पाख्रिन मार्ग अन्तर्गत किन्ताङफेदीमा चाइनिज ब्रिज निर्माण गरिएसँगै उत्तरी धादिङकोे विकासको ढोका खुलेको छ । उत्तरी धादिङलाई जिल्ला सदरमुकामसँग जोड्ने मूख्य मार्ग खनियाँबास गाउँपालिका–४ किन्ताङफेदीमा ट्रयाक खोलिएको झन्डै चार दशकपछि चाइनिज ब्रिज निर्माण भएसँगै ६ महिना मात्र सवारी चल्ने उत्तरी धादिङमा अब बाह्रै महिना सवारी आवागमन हुने भएको हो ।

Advertisement

सडक खन्न थालिएको करिब चार दशकपछि निर्माण गरिएको पुल आइतबार एक कार्यक्रमका विच संघीय सांसद रामनाथ अधिकारी र नेपाली सेनाको प्रधानसेनापती महारथी प्रभुराम शर्माले संयुक्त रुपमा चाइनिज ब्रिज उद्घाटन गरेका हुन् ।

उद्घाटन समारोहलाई सम्बोधन गर्दै किन्ताङफेदीमा पुल निर्माण भएसगै उत्तरी धादिङबासीको जीवन नै फेरिने संघीय सांसद रामनाथ अधिकारीले बताए । ‘पुलले उत्तरी धादिङको विकासको ढोका खोलेको छ । उत्तरी धादिङमा सडक सञ्जालको सहज पहुँच बन्यो । अब बाह्रै महिना सवारी चल्दा उत्तरी धादिङको विकासमा टेवा पुग्नेछ’ उनले भने ।

पुल हालिएसँगै उत्तरी धादिङले विकासमा अब फड्को मार्ने खनियाँबास गाउँपालिकाका अध्यक्ष रणबहादुर तामाङले बताए । खनियाँबास, गंगाजमुना, रुवीभ्याली र नेत्रावती डवजोङ गाउँपालिकाको केही वडाबासीहरु प्रत्यक्ष लाभान्वित बनेका छन् ।

‘उत्तरी धादिङलाई जिल्ला सदरमुकाम जोड्ने यो नै मुख्य मार्ग हो । पुल नहुँदा बर्खाको ५÷६ महिना सवारी आवतजावत बन्द हुने गर्दथ्यो’ उनले भने– ‘उत्तरी धादिङको रुवीभ्याली, गंगाजमुना, खनियाँबास र नेत्रावती डवजोङ गाउँपालिकालाई जोड्ने ४२ दशमलव ६७ मिटर लम्बाई, ४ दशमलव.२ मिटर चौडाइको पुल निर्माण भयो । अब बाह्रै महिना बाह्रै काल सवारी चल्नेछ । भाडादर पनि सस्तोभएको छ । भएका उत्पादन पनि बजार पुग्नेछ । उत्तरी धादिङबासीको जीवनशैली नै फेरिनेछ ।’

उत्तरी धादिङको जीवनस्तरमा सुधार ल्याउन पुल निर्माणका लागि २५ लाख आर्थिक सहयोग गरेको नेत्रावती डवजोङ गाउँपालिकाका अध्यक्ष मेघनाथ रिजालले बताए । पुल नहुदा आपतकालिन समयमा ठूलो समस्या व्यहोर्नु पर्याे । पुल बनेपछि उत्तरी धादिङको जनताको मुक्तिको दिन शुरु भएको खनियाबास गाउँपालिकाका उपाध्यक्ष सेक्केमान तामाङको भनाइ छ । जनजीवन सहज र उत्पादित कृषिजन्य उत्पादन बजारसम्म लैजान सकिने हुदा जीवनस्तरमा पनि सुधार हुने उनले बताए ।

नेपाल विद्युत प्राधिकरणको त्रिशुली थ्रि ए र थ्रि बि को स्वामित्वमा रहेको बेत्रावतीबाट ल्याएर हाल किन्ताङफेदीमा जडान गरिएको खनियाबास गाउँपालिकाका इन्जिनियर जीवन गुरुङले बताए । उनले भने– ‘पुल निर्माणमा १४ बाहिनी अन्तर्गत व्रिजिङ यूनिट गौचरन एयरपोर्टबाट ३५ जना दक्ष कामदार सहितको टोलीले जडान गरिरहेको छ । करिव एक करोड लागत रहेको पुल निर्माणका लािग २५ लाख रकम नेत्रावती डवजोङ गाउँपालिकाले र बाँकी खनियाँबास गाउँपालिकाले व्यहोरेकोे हो ।’

ट्रयाक खोलिएको झन्डै चार दशकपछि अहिले किन्ताङ खोलामा चाइनिज ब्रिज हाल्ने काम भएपछि धादिङको उत्तरी क्षेत्रका स्थानीय खुसी बनेका छन् । पुल बनेपछि गाउँमा विकास पुग्ने अपेक्षा गरिएको स्थानीय प्रकाश तामाङले बताए । ‘पुल बनेपछि हामी नागरिकले कति राहत पाउँछौं कल्पनै गर्न सकिन्न । सडक छ, तर अहिले घन्टौं लगाएर हिँडेरै यात्रा गर्न बाध्य छौं । कृषिजन्य उत्पादन गाउँमा कुहिएर बसेको छ । तर, बजारसम्म लैजान सकिएको छैन,’ उनले भने, ‘कृषिजन्य उत्पादन बिक्री गरेर घर खर्च चलाउने र चाडपर्व मनाउने किसानको दैनिकी सकस र खल्लो बनेको थियो । अहिले पुल बन्यो हामी उत्तरी धादिङबासीमा जोस जाँगर र हौसला थपिएको छ ।’