बाढीमा बगेर कैलाली र कञ्चनपुरमा २ जना बेपत्ता, ६ सय भन्दा धेरै परिवार प्रभावित

काठमाडौं– वर्षासँगै नदीमा आएको बाढीमा बगेर कैलाली र कञ्चनपुर जिल्लामा दुई जना बेपत्ता भएका छन् ।

Advertisement

प्रदेश प्रहरी कार्यालय धनगढीका अनुसार कैलालीको कैलारी गाउँपालिका–९ गदरिया गाउँको भुर्रा नदीमा डुबेर आइतवार बेलुकी त्यही ठाउँका १८ वर्षीय अजय राना बेवेपत्ता भएका हुन् । नुहाउने क्रममा डुबेर बेपत्ता भएका रानाको प्रहरीले खोजी गरिरहेको छ ।

यस्तै हिजै कञ्चनपुरको बेलडाँडी गाउँपालिका–३ का २३ वर्षीय डम्मर चौधरी नजिकै रहेको चौदर नदीमा डुबेर बेपत्ता भएका छन् । नदीमा माछा मार्न गएको बेला चौधरी डुबेर बेपत्ता भएका प्रहरीले जनाएको छ ।

अविरल वर्षासँगै कैलाली र कञ्चनपुरका विभिन्न नदी र खोलाको जलसतह बढेपछि नदी तटीय क्षेत्रका बासिन्दालाई सतर्क रहन स्थानीय प्रशासनले सूचना निकालेको छ । गाउँमा बाढी पस्दा कैलाली र कञ्चनपुरका ६ सय परिवार प्रभावित भएका छन् ।