नारायणगढ–मुग्लिन सडकको सिमतालमा पहिरोले दुई वटा बस बगायो, चालकसहित ६५ जना यात्रु रहेको अनुमान

काठमाडौं– नारायणगढ–मुग्लिन सडकको सिमलतालमा लेदोसहितको पहिरोले दुईवटा बस बगाएर त्रिशूली नदीमा बेपत्ता भएको छ । ती बसमा चालकसहित झण्डै ६५ जना यात्रु रहेका प्रहरीले जनाएको छ । घटनास्थलमा पुगेका चितवनका प्रमुख जिल्ला अधिकारी इन्द्रदेव यादवकाअनुसार आज बिहान साढे ३ बजे दुईवटा बस त्रिशूलीमा खसेका हुन् ।

Advertisement

उनका अनुसार काठमाडौंबाट रौतहटको गौरको लागि छुटेको गणपति डिलक्स र वीरगञ्जबाट काठमाडौंको लागि छुटेको गरेको एञ्जल बस त्रिशूलीमा खसेका हुन् ।

प्रजिअ यादवकाअनुसार गौर जाँदै गरेको बसमा ४१ र काठमाडौं आउँदै गरेको बसमा २४ जना यात्रु रहेका थिए । उनले ती बसमा रहेका यात्रुको यकिन विवरण भने प्राप्त नभएको बताएको छ ।