नेप्से एकैदिन १ सय २७ अङ्कले बढेर २८ सय विन्दुमाथि

काठमाडौं – केही दिनयता घटिरहेको सेयर बजार आज उच्च अङ्कले बढेको छ । सेयर बजार परिसूचक नेप्से आज एक सय २७ दशमलव ३२ विन्दुले बढेर दुई हजार आठ सय २३ दशमलव २५ विन्दुमा पुगेको छ ।

Advertisement

आज सबै समूहको सेयर बढेकोमा बीमा, विकास बैंक, फाइनान्स, होटल, जलविद्युत्, उत्पादन, माइक्रोफाइनान्स, व्यापार समूहको सेयर उच्च अङ्कले उकालो लागेको छ ।

आज नौ वटा कम्पनीका सेयर १० प्रतिशतले बढेको छ । यस्तै आठ वटा कम्पनीका सेयर नौ प्रतिशतभन्दा धेरैले बढेको छ । बजार उच्च अङ्कले बढेको दिन लक्ष्मी उन्नति कोषको सेयर भने चार प्रतिशतभन्दा धेरैले घटेको छ ।

आज तीन सय ३५ वटा कम्पनीका तीन करोड १४ लाख कित्ता सेयर १३ अर्ब १० करोड रुपैयाँमा कारोबार भएका छन् ।