सेयर बजार ५ दिनयता ओरालो यात्रामा

काठमाडौं– सेयर बजार आज पनि घटेको छ । सेयर बजार परिसूचक नेप्से आज १३ दशमलव शून्य नौ अङ्कले घटेर दुई हजार ६ सय ३२ दशमलव ९४ विन्दुमा झरेको छ ।

Advertisement

नेप्से पछिल्लो पाँच कारोबार दिन लगातार घटिरहेको छ । नेप्से गएको साताको बुधवार ९० दशमलव ७३, बिहीवार १२ दशमलव १० अङ्कले घटेको थियो । यस्तै यो साताको पहिलो कारोबार दिन अस्ति २५ दशमलव ४६ र हिजो ५५ दशमलव ८६ अङ्कले घटेको थियो ।

आज बीमा, उत्पादन, माइक्रोफाइनान्स, विकास बैंक, फाइनान्स, जलविद्युत् समूहको सेयर उच्च अङ्कले घटेको छ । यस्तै व्यापार समूहको सेयर सामान्य बढ्दा होटल समूहको सेयरमा घटबढ भएको छैन ।

आज कारोबार रकम पनि घटेको छ । आज तीन सय २८ वटा कम्पनीका एक करोड ९० लाख कित्ता सेयर सात अर्ब २४ करोड रुपैयाँमा कारोबार भएका छन् ।