करिव चार क्विन्टल लागुऔषध गाँजासहित दुईजना पक्राउ

काठमाडौं– हेटौँडाबाट झन्डै ४ क्विन्टल लागुऔषध गाँजा र ट्यांकर गाडीसहित दुईजनालाई मकवानपुर प्रहरीले पक्राउ गरेको छ ।

Advertisement

पक्राउ पर्नेहरूमा मकवानपुरको मनहरी गाउँपालिका– ९ ज्यामिरेका २६ वर्षीय ट्यांकर चालक रोशन पुरी र सहचालक सोही स्थानका २२ वर्षीय धनबहादुर मल्ल रहेका छन् ।

प्रहरीका अनुसार पूर्व–पश्चिम लोकमार्ग अन्तर्गत हेटौँडा– १५ रातोमाटेमा पालुङबाट वीरगन्जतर्फ जाँदै गरेको ना७ख १७७१ को ट्यांकर गाडीलाई रोकी जाँच गर्ने क्रममा करिव ४ क्विन्टल लागुऔषध गाँजा फेला परेको हो ।

प्रहरीले विशेष सूचनाका आधारमा ट्यांकर रोकी चालक र सहचालकसहित ट्यांकरसमेतको खानतलासी गर्दा ट्यांकरको पाँचवटा डिब्बामध्ये ३ नम्बरको डिब्बाभित्र २५ वटा पोका पारी ल्याएको अवस्थामा बरामद गरेको हो ।

ट्यांकर गाडीसहित चालक रोशन पुरी र सहचालक धनबहादुर मल्ललाई नियन्त्रणमा लिई थप अनुसन्धान भइ रहेको प्रहरीले जानकारी दिएको छ ।