धादिङको खाल्टेमा श्रीमद् भागवत सप्ताह, शैक्षिक तथा धार्मिक महोत्सव हुने

धादिङ–धादिङको नीलकण्ठ नगरपालिका–५ खाल्टेमा श्रीमद् भागवत सप्ताह धनधान्याञ्चल बिराट ज्ञान महायज्ञ एवम् शैक्षिक तथा धार्मिक महामहोत्सव हुने भएको छ । खाल्टे देउरालीमा अवस्थित श्री मनकामना देवी आधारभूत विद्यालयमा प्राविधिक शिक्षालयको स्थापना एवम् शैक्षिक उन्नयन गर्ने उद्देश्यले यहि कात्तिक २९ गतेदेखि मंसिर ७ गतेसम्म महोत्सवको आयोजना गरिएको भागवत संयोजक कपिल भट्टले जानकारी दिए ।

Advertisement

महोत्सवबाट विद्यालयमा गुणस्तरिय शिक्षामा सहयोग पुग्ने अपेक्षा गरिएको उनले बताए । ‘पण्डित श्री विजय सिग्देलको मुखारविन्दुबाट कथा वाचन हुनेछ । हामीले अहिलेदेखि नै प्रचारप्रसार गरिरहेका छौं । विगतका अनुभवले पनि भक्तजनको राम्रो उपस्थिति हुने र यो धार्मिक तथा सामाजिक कार्यमा सबैले सहयोग गर्नुहुनेछ भन्ने अपेक्षा गरेका छौं’ उनले भने ।