दाङमा जीप दुर्घटना हुदा २ जनाको मृत्यु

काठमाडौं– दाङमा जीप दुर्घटना हुँदा दुई जनाको ज्यान गएको छ। राप्ती राजमार्गको तुलसीपुर कपुरकोट सडकखण्डको सात तलेमा दुर्घटना हुँदा दुई जनाको घटनास्थलमै मृत्यु भएको इलाका प्रहरी कार्यालय तुल्सीपुरले जानकारी दिएको छ ।

Advertisement

दुर्घटनामा परी जिप चालक दंगिशरण गाउँपालिका-४ बैबाङका २२ वर्षीय हिरामणी बुढामगर र सल्यानको कपुरकोट गाउँपालिका वडा नम्बर ६ का १९ वर्षीय सुरेश खड्काको मृत्यु भएको प्रहरीले जानकारी दिएको छ ।

रोल्पाको कोइलाबाट तुलसीपुरतर्फ आइरहेको रा १ ज ८२२ नम्बरको डबल क्याब जिप तुलसीपुर-३ साततलेमा दुर्घटनामा भएको हो। जिप सडकबाट करिब ३०० मिटर तल खसेको प्रहरीले जनाएको छ।

जिपमा ५ जना सवार रहेको र अरु तीन जना पनि गम्भीर घाइते भएका छन् ।