सेयर बजार सामान्य बढ्यो

काठमाडौं– सेयर बजार आज सामान्य बढेको छ । सेयर बजार परिसूचक नेप्से आज दिनभरको उतारचढावबीच नौ दशमलव शून्य नौ अङ्कले बढेर दुई हजार सात सय ११ दशमलव ७५ विन्दुमा पुगेको छ ।

Advertisement

आज बैंक, बीमा, उत्पादन र अन्य बाहेक सबै समूहको सेयर बढेकोमा विकास बैंक, फाइनान्स, जलविद्युत्, होटल समूहको सेयर उच्च अङ्कले बढेको छ ।

आज विकास बैंकमा लगानीकर्ताको आकर्षण देखिएको छ । आज कर्पाेरेट विकास बैंक, सिन्धु विकास बैंक, नेपाल हाइड्रो डेभलपर्स, सप्तकोशी विकास बैंक, मानुषी लघुवित्त, कर्णाली विकास बैंक र जानकी फाइनान्स कम्पनीको सेयर १० प्रतिशतले बढेको छ । समग्रमा बजार बढेको दिन गुराँस लघुवित्त कम्पनीको सेयर भने १० प्रतिशतले घटेको छ ।

आज नेप्से बढे पनि कारोबार रकम भने घटेको छ । हिजो झन्डै साढे १० अर्बको सेयर कारोबार भएकोमा आज तीन सय २३ वटा कम्पनीका एक करोड ५४ लाख कित्ता सेयर सात अर्ब नौ करोड रुपैयाँमा किनबेच भएको छ ।