धादिङमा दोस्रो सल्यानटार कृषि मेला सुरु, सिंचाईको पहल गर्छाैं– मन्त्री सिलवाल

काठमाडौं– धादिङको सल्यानटारमा सिंचाईको पहल गरि किसानलाई आत्मनिर्भर बनाउने बागमती प्रदेश सरकारका वन तथा वातावरण मन्त्री कृष्ण प्रसाद सिलवालले बताए ।

Advertisement

लोप हुदै गएको थुप्रै रैथानेबालीहरु सल्यानटारमा उत्पादन हुने भन्दै सिंचाईको व्यवस्था भए किसानहरु आत्मनिर्भर बन्ने उनले बताएका छन् । धादिङको त्रिपुरासुन्दरी गाउँपालिका–२ सल्यानटारमा हामी सबैको कृषि तथा बहुउद्देश्यीय सहकारी संस्था लिमिटेडद्धारा आयोजित दोस्रो सल्यानटार कृषि प्रदर्शनी तथा व्यापार मेलाको उद्घाटन समारोहको सम्बोधन गर्दै मन्त्री सिलवालले यस्तो बताएका हुन् ।

‘सल्यानटार यस अघि नै डिपिआर भएको क्षेत्र हो । आगामी दिनमा सिंचाईको पहल गरि सल्यानटारलाई हराभरा बनाउन हामी लाग्नेछौं’ उनले भने– ‘सहकारी मार्फत यसरी महोत्सव होस् वा अन्य तवरबाट कृषि क्षेत्रमा आकर्षित गर्नु राम्रो काम हो । उत्पादित कृषि जन्य उत्पादनको बजारीकरण र कृषि क्षेत्रमा युवालाई रोजगारी दिलाउन सकियो भने सल्यानटार एउटा उदाहरणीय क्षेत्र बन्ने छ । हामी पहल गर्छौ ।’

स्थानिय श्रोतको प्रर्वद्धन गरौं, देश विकासमा टेवा पुुर्याऔंं भन्ने मूल मर्मका साथ त्रिपुरासुन्दरी गाउँपालिका–२ सल्यानटारमा दोस्रो सल्यानटार कृषि प्रदर्शनी तथा व्यापार मेला सुरु भएको हो ।
स्थानिय कृषि उपजहरुलाई प्रर्वद्धन तथा बजारीकरणमा टेवा पुग्ने महोत्सव आयोजक संस्था हामी सबैको कृषि तथा बहुउद्देश्यीय सहकारी संस्था लिमिटेडका अध्यक्ष सुरेश श्रेष्ठले बताए ।

‘सल्यानटार पर्यटकिय, धार्मिक तथा ऐतिहासिक तवरले मात्र प्रख्यात नभई कृषि जन्य उत्पादनको पनि प्रवल सम्भावना रहेको क्षेत्र हो’ उनले भने– ‘सल्यानटारको मास र घैयाको धान नेपालमै प्रसिद्ध रहेको छ । पिडालु, भटमास, लिचि, केरा, आँप लगायत यस्ता थुप्रै कृषिजन्य उत्पादनको सम्भावना रहेको क्षेत्र हो । सिंचाईको व्यवस्थासँगै किसानले उचित मूल्य पाउने गरि बजारीकरण मात्रै पनि सल्यानटारबासीको जीवन फेरिनेछ ।’

मंसिर ५ गतेदेखि सुरु भएको महोत्सव मंसिर १५ गतेसम्म चल्नेछ । महोत्सवमा करिव एक लाख जनाले महोत्सवको अवलोकन गर्ने अनुमान रहेको अध्यक्ष श्रेष्ठले बताए ।