स्कर्पियो दुर्घटना हुँदा ८ जनाको मृत्यु

काठमाडौं– रौतहटमा स्कर्पियो दुर्घटना हुँदा चालकसहित आठ जनाको ज्यान गएको छ । दुर्घटनामा परि बालबालिकासहित चार जना घाइते छन् ।

Advertisement

रौतहटको चन्द्रपुर नगरपालिकास्थित पूर्वपश्चिम राजमार्गको धन्सार–लमाहा खण्ड धन्सारपुल नजिकै जंगलमा बाराको गढीमाई दर्शन गरेर सिराहा फर्कँदै गरेका दर्शनार्थी चढेको बा १६ च ३१६२ नम्बरको स्कर्पियो अनियन्त्रित भई रोडबाट तल रुखमा ठोक्किएर दुर्घटना भएको इलाका प्रहरी कार्यालय चन्द्रनिगाहपुरले जानकारी दिएको छ ।

प्रहरीका अनुसार दुर्घटनामा आठ जनाको मृत्यु भएको हो । दुर्घटनमा परि ज्यान गुमाउनेहरुमा सिरहाको अर्नामा गाउँपालिका ३ का ६० वर्षीया लरुवदि देवी महरा, ३० वर्षीया उर्मिला देवी महरा, ५० वर्षीया रामकुमारी देवी महरा, ५५ वर्षीया महङ्गी देवी महरा, ६२ वर्षीया फुलबन्ती देवी चमार, ६० वर्षीया रामकुमारी देवी महरा, ३० वर्षीया सकुन्तला देवी महरा र स्कार्पियो चालक ४० वर्षीय शिव कुमार यादव रहेका छन्। ‘गढीमाई दर्शन गरेर घर फर्कँदै गर्दा स्कर्पियो सडकबाट तल खसेर रुखमा ठोक्किएर पल्टिएको हो । घटना लगत्तै पुगेर घाइतेहरूको उद्धार गरी अस्पताल लगिएको छ । चार जना घाइते भएका छन् ।

दुर्घटनामा दुई बालबालिकासहित घाइतेको चन्द्रनिगाहपुरस्थित ट्रमा सेन्टरमा उपचार भइरहेको छ । एक जनालाई थप उपचारको लागि वीरगन्ज रेफर गरिएको छ ।