अटो रिक्सा दुर्घटना हुँदा एक बालिकाको मृत्यु, ४ जना घाइते

काठमाडौं – रुकुम पूर्वको सिस्ने गाउँपालिका–६ पाखागाउँमा अटो रिक्सा दुर्घटना हुँदा एक बालिकाको मृत्यु भएको छ । दुर्घटनामा चार जना घाइते भएका छन् ।

Advertisement

ज्यान गुमाउनेमा सिस्ने–६ खोपिचारकी १२ वर्षीया विष्णु बुढामगर रहेकी प्रहरीले जनाएको छ । जिल्ला प्रहरी कार्यालय रुकुम पूर्वका प्रहरी निरीक्षक हिमबहादुर केसीका अनुसार दुर्घटनामा गम्भीर घाइते भएका सिस्ने–६ का १६ वर्षीय महेन्द्र बुढामगरलाई थप उपचारका लागि नेपालगञ्ज पठाइएको छ । अन्य तीन जनाको अवस्था सामान्य रहेको र जिल्ला अस्पताल रुकुमकोटमा उपचार भइरहेको छ ।

लुम्बिनी प्रदेश ०२००१ ह ०३५० नम्बरको अटो रिक्सा मध्यपहाडी सडकको पाखाँगाउँबाट रुकुमकोट आउँदै गर्दा दुर्घटनामा परेको थियो ।

अटो रिक्सा अनियन्त्रित भई सडकबाट तल खसेको प्रहरीले जनाएको छ ।