धादिङ अस्पताललाई ८० लाखको ल्याप्रोस्कोपी टावर मेसिन सहयोग

काठमाडौं– धादिङ अस्पताललाई ल्याप्रोस्कोपी टावर मेसिन उपलब्ध गराइएको छ । पेट, पाठेघर, पित्तथैली, एपेन्डिक्स, आन्द्रा, र अन्य अंगहरूको उपचार गर्न प्रयोग गरिने करिव ८० लाख मूल्य पर्ने उक्त मेसिन धादिङ अस्पताल ल्याइएको हो ।

Advertisement

यो मेसिनले उपचारमा छिटो र विरामीलाई पनि सहज हुने धादिङ अस्पतालका निमित्त अस्पताल निर्देशक डाक्टर गगन अधिकारीले बताए । ‘परम्परागत शल्यक्रिया पद्धतिमा पेटमा ठूलो चिरा बनाएर शल्यक्रिया गर्दा निको हुन धेरै समय लाग्छ । तर, यो मेसिनको प्रयोग गरी की–होल सर्जरी गर्न सकिने हुदाँ बिरामी छिटो निको हुन्छन् । यो मेसिनले धादिङ अस्पतालको सेवा चुस्तसँगै विरामीहरुलाई पनि ठूलो फाइदा पुग्नेछ’ उनले भने ।

खासमा पेट, पाठेघर, पित्तथैली, एपेन्डिक्स, आन्द्रा, र अन्य अंगहरूको उपचार गर्न सजिलो बनाउने उनले बताए । ‘ल्यापारोस्कोपिक टावरको प्रयोग विभिन्न प्रकारका आधुनिक सर्जरीहरूमा गरिन्छ’ उनले भने– ‘यस मेसिनबाट साना चिराहरुबाट की–होल सर्जरी गरिन्छ । यसले उच्च रिजोल्युसन भएको क्यामेराको मद्दतले सर्जरीको क्षेत्रलाई ठूलो रूपमा देखाउने हुँदा सटीकता र प्रभावकारिता रुपले उपचार गर्न सकिन्छ । साना चिराहरू बनाएर उपाचार गरिने हुँदा विरामी चाँडै निको हुन्छन् । पेट, पाठेघर, पित्तथैली, एपेन्डिक्स, आन्द्रा, र अन्य अंगहरूको उपचार गर्न यसको प्रयोग गर्ने गरिन्छ ।’

धादिङ अस्पतालमा यसरी आइपुग्यो ल्याप्रोस्कोपी टावर मेसिन

धादिङको सिद्धलेक गाउँपालिका आरुबासमा जन्मिएका डाक्टर कमल राज अर्यालले गृह जिल्लामा रहेको धादिङ अस्पताललाई मेसिन उपलब्ध गराएका हुन् । धादिङमा जन्मिएर विदेशी भूमिलाई कर्मथलो बनाएका डाक्टर अर्यालको विशेष पहलमा उक्त मेसिन ल्याइएको हो ।

जेम्स पागेट विश्वविद्यालय अस्पतालमा कन्सल्टेण्ट सर्जनको रूपमा कार्यरत छन् । पूर्वी इङ्गल्याण्ड विश्वविद्यालयको एसोसियेट प्रोफेसर र नेपालिज डक्टर्स एसोसिएसन युकेका पूर्व अध्यक्ष पनि हुन् । उनले विगत १० वर्षदेखि बेलायत, स्विजरल्याण्ड र मलेसियन टिमलाई नेपाल ल्याएर २०० भन्दा बढी सर्जनहरूलाई की–होल (पभथ जयभि) सर्जरी प्रशिक्षण दिदै आएका छन् ।

सोहि क्रममा धादिङ अस्पतालबाट डाक्टर प्रतिभा धौवाडेल सहभागी भएका थिए । उनले ल्यापारोस्कोपिक सर्जरी टावरको आवश्यकता रहेको बताएका थिए । डाक्टर कमल राज अर्यालले पनि धादिङ अस्पताल अवलोकन गरी प्रक्रिया अघि बढाएका थिए । गृह जिल्ला भ्रमण गर्ने क्रममा आवश्यकताको महसुस र चिकित्सकको माग अनुसार विदेशी साथी डाक्टर जेरेमी वार्डको मद्दतमा फुलवुड अस्पताल प्रेस्टनबाट यी टावरहरू ल्याएका हुन् । टावर स्थानान्तरणको व्यवस्थापनमा हेल्थ एक्सचेन्ज नेपाल यूकेले सहयोग गरेको धादिङ अस्पतालका निमित्त अस्पताल निर्देशक डाक्टर गगन अधिकारीले बताए ।

कोभिड महामारीका क्रममा डाक्टर अर्यालले धादिङ अस्पताललाई दुई अक्सिजन कन्सन्ट्रेटर उपलब्ध गराएका थिए । २०१५ को भूकम्पमा उनले धादिङको आरुबास र गोरखाको दरबुङमा दुई विद्यालय पुनर्निर्माण गर्न पनि सहयोग गरेका थिए । विगत ९ वर्षदेखि आरुबासको कालीदेवी उच्च मावि र दरबुङको भगवती माध्यमिक विद्यालयमा एसईई परीक्षामा सर्वाधिक अंक ल्याउने विद्यार्थीलाई ‘डाक्टर पुरस्कार’ प्रदान गर्दै आएका छन् ।