बेनीघाट रोराङको निःशुल्क शिक्षामा जोडः शैक्षिक उत्थान कोष खडा गर्न महायज्ञ लगाउने

काठमाडौं- धादिङको बेनीघाट रोराङ गाउँपालिकाले शैक्षिक उन्नयनका लागि श्रीमद्भागवत सप्ताह ज्ञान महायज्ञ गर्ने भएको छ । विपन्न तथा असहाय बालबालिकालाई निःशुल्क तथा गुणस्तरीय शिक्षा प्रदान गर्ने उद्देश्यले पालिकाले महायज्ञको आयोजना गरेको हो ।

Advertisement

महायज्ञबाट संकलन हुने रकमबाट शैक्षिक उत्थान कोष खडा गरी पालिका भित्रका सबै बालबालिकालाई निःशुल्क शिक्षा प्रदान गर्ने बेनीघाट रोराङ गाउँपालिकाका अध्यक्ष कृष्ण बहादुर थपलिया (विवेक)ले बताए । ‘बेनीघाट रोराङ गाउँपालिकामा प्रायः आर्थिक अवस्था कमजोर भएका बालबालिकाहरु छन् । जसलाई गाँस, बास र कपासकै चिन्ताले पिरोल्ने गरेको छ । त्यस्ता बालबालिकालाई निःशुल्क शिक्षा प्रदान गर्ने हाम्रो मूख्य उद्देश्य हो ।’

‘गाउँपालिकाले एकिकृत आवासिय विद्यालय निर्माण गरिरहेको छ । चेपाङ, असहाय, गरिव, दलित, विपन्न, बुबाआमा नभएका बालबालिकालाई निःशुल्क शिक्षा दिने अभियानमा छौं’ उनले भने– ‘केही वडाका बालबालिकालाई निःशुल्क शिक्षा दिदै आएका छौं । अहिले शैक्षिक उत्थान कोष खडा गर्दैछौं । यो महायज्ञले निःशल्क शिक्षा प्रवाह गर्ने हाम्रो अभियानलाई सफल पार्न ठूलो सहयोग मिल्नेछ ।’

महायज्ञ आगामी माघ १७ देखि २३ गतेसम्म गाउँपालिकाको वडा नम्बर ७ स्थित चरौँदी खेलमैदानमा आयोजना गरिने बेनीघाट रोराङ गाउँपालिकाका प्रमुख प्रशासकिय अधिकृत नर्वदा घिमिरेले जानकारी दिइनन् । प्रसिद्ध कथावाचिका राधिका दासीले ज्ञान महायज्ञमा कथा बाचन गर्ने कार्यक्रम रहेको छ । यो महायज्ञबाट संकलित रकमलाई आवासिय विद्यालयका लागि शैक्षिक कोष खडा गरि विपन्न तथा असहाय विद्यार्थीको निःशुल्क शिक्षामा लगानी गरिने हुदाँ यो साझा अभियान रहेको उनको भनाई छ ।