२०८१ चैत्र २५, सोमबार
काठमाडौं– प्रधानमन्त्री केपी शर्मा ओलीले खुम्बु ‘पासाङल्हामू’ गाउँपालिकाको केन्द्र चौरीखर्क ‘ङिमदोर्जी शेर्पा पर्यटन सडक’ को कालोपत्रे गरिने बताएका छन् ।
सोलुखुम्बुको पर्यटकीय क्षेत्रमा रहेको खुम्बु पासाङल्हामु गाउँपालिका केन्द्र जोड्ने ‘ङिमदोर्जी शेर्पा पर्यटन सडक’ उद्घाटन समारोहको सम्बोधन गर्दै यस्तो बताएका हुन् । तेन्जिङ हिलारी विमानस्थल लुक्लाले सहज बनाएको खुम्बुको पर्यटन व्यवसाय हालै सञ्चालनमा आएको छ । सडकले थप सहज बनाएको उनले बताए ।
यो तेन्जिङ नोर्गे शेर्पा, पासाङल्हामु शेर्पा लगायत तिसौँ पटक सगरमाथाको आरोहण गर्ने साहसीहरूको जिल्ला भएको भन्दै उनले अब यस क्षेत्रको विकास र प्रगति हुने बताए । सो अवसरमा प्रधानमन्त्री ओलीले राष्ट्रिय विभूति तथा प्रथम नेपाली सगरमाथा आरोही पासाङल्हामू शेर्पाको घर समेत अवलोकन गरेका छन् ।
खुम्बु पासाङल्हामु गाउँपालिकाको मुख्य लगानीमा दुई वर्षअघि खुम्बु पासाङल्हामु–१ खरिखोलाबाट वडा नं. २ सुर्केसम्म ट्रयाक खन्न शुरु भएको हो । २५ किलोमिटर सडक करिब १६ करोड रुपियाँको लागतमा निर्माण भएपछि पर्यटकीय पदमार्ग सञ्चालनमा आएको हो । परियोजनाका लागि पालिकाले स्थानीय जलविद्युत् आयोजनाहरू सिल्क पावर र दूधकोशी छैटौँसँग साझेदारी गरेको छ ।
थाम डाँडाबाट सुर्केसम्मको १२.५ किलोमिटर सडक ठेक्का प्रणालीमार्फत १० करोड ५२ लाख रुपियाँमा निर्माण सम्पन्न भएको छ । जसमा ५० प्रतिशत लगानी गाउँपालिकाको छ भने बाँकी ५० प्रतिशत जलविद्युत् आयोजनाबाट जुटाइएको छ । खरिखोलाबाट थाम डाँडासम्मको १२.३ किलोमिटर सडक छ करोड १४ लाख रुपियाँको लागतमा पालिकाको आफ्नै स्रोतबाट निर्माण गरिएको हो । सदरमुकाम सल्लेरीबाट ६४ किलोमिटर दुरीमा सुर्के रहेको छ ।
बाटो खुलेसँगै अहिले दैनिक यात्रुबाहक बस, सुमो र बोलेरोले यात्रुहरूलाई लुक्लामुनिको सुर्केसम्म पुर्याउने गरेका छन् । सुर्केबाट लुक्ला विमानस्थल एक घण्टाको पैदल दुरीमा पर्छ ।
स्रोतहरू खुलाइएका बाहेक नेपालपथ मिडिया नेटवर्क द्वारा प्रकाशित सम्पूर्ण सामग्रीहरू नेपालपथ डट कमका सम्पत्ति हुन् ।
लेखकबाट थप
नेपालपथ नेटवर्क
निलकन्ठ, धादिङ्ग, बागमती प्रदेश
सम्पर्क: ९८४१७१७८१२
स्थायी लेखा नं.: १११८६६३०८
सञ्चार रजिष्ट्रार दर्ता प्र.नं.: ००२३२/०८०/०८१
वेबसाईट: nepalpath.com
| सम्पादक : | अर्जुन श्रेष्ठ |
| सह सम्पादक : | तिर्थमाया तामाङ्ग |
| ब्यबस्थापक : | सविना रंजितकार |
