रोटरी क्लव अफ धादिङद्धारा विद्यार्थीलाई न्यानो कपडा वितरण

काठमाडौं- दक्षिणी धादिङको गजुरी गाउँपालिका–३ गन्राङमा रहेको कंकालिनी आधारभुत विद्यालयका विद्यार्थीहरुलाई न्यानो कपडा वितरण गरेको छ । रोटरी क्लव धादिङले १५५ जना विद्यार्थीहरुलाई न्यानो कपडा वितरण गरेको हो ।

Advertisement

रोटरी क्लव अफ धादिङमा आवद्ध सदस्यहरुले आफैले जुटाएको रकमबाट १२२ जना चेपाङ समुदायका विद्यार्थीसहित १५५ जना बालबालिकाहरुलाई न्यानो स्विटर, टोपी, जुत्ता र मोजाका सामाग्रीहरु वितरण गरेको रोटरी क्लव धादिङका सर्भिस प्रोजेक्ट चेयर प्रकाश भण्डारीले बताए । जिल्ला प्रशासन कार्यालय धादिङको सहकार्यमा न्यायो कपडा वितरण गरिएको हो । यो जाडो समयमा आर्थिक अवस्था कमजोर भएका बालबालिकालाई केही राहत होस् भन्ने उद्देश्यले सिमान्तकृत चेपाङसहित अन्य बालबालिकालाई न्यायो कपडा वितरण गरिएको उनको भनाई छ ।

कार्यक्रममा रोटरी क्लव धादिङका अध्यक्ष रोटरीयन सुदिप रसाईली बालबालिकालाई न्यायो कपडा दिएर सहयोग गर्न पाउँदा खुसी लागेको बताउँछन् । ‘शिक्षा, स्वास्थ्य, वातावरण लगायतका क्षेत्रमा क्लवले विविध सामाजिक कार्य गर्दै आएको छ । बालबालिकाहरुलाई न्यानो कपडा दिन पाउँदा समग्र क्लव परिवार नै खुसी छौं’ उनले भने ।

त्यस्तै, रोटरी ईन्टनेशनल ३२९२ का असिस्टेन्ट गर्भनर समेत रेहेका रोटरीयन अशोक बस्नेतले सामाजिक कार्यमा सबै एकजुट भएर लाग्नु पर्ने बताए । आफ्नो ठाउँ आफै बनाऔं भनेझै सबै एक जुट भएर जुट्नुपर्ने उनले बताए ।

न्यानो कपडा वितरण कार्यक्रममा पुगेका गजुरी गाउँपालिकाका अध्यक्ष गणेशलाल श्रेष्ठ, उपाध्यक्ष शर्मिला विशुराल, जिल्ला प्रशाशन कार्यलयका प्रमुख सुमन घिमिरे, जिल्ला प्रहरी प्रमुख दिपेन्द्र शाही, सशस्त्र प्रहरी प्रमुख लक्ष्मी थपलिया तथा वडाअध्यक्ष ऋशिलाल श्रेष्ठ लगायत रोटरी क्लव पूर्व अध्यक्ष रोटरीयन कृष्णलाल उप्रेती, कोषाध्यक्ष रोटरीयन सरस्वति थापा लगायतको टोलीले सामाजिक कार्यको प्रशंसा गरेका छन् । आगामी दिनमा पनि पालिका भित्रको सामाजिक कार्यमा सहकार्य गर्दै जाने गजुरी गाउँपालिकाका अध्यक्ष गणेशलाल श्रेष्ठले बताए ।

जाडोमा न्यानो कपडा पाएका विद्यार्थीहरु खुसी बनेका छन् । चिसोमा लगाउने न्यानो कपडाको अभाव झेलेका विद्यार्थीहरुले न्यानो कपडा भएपछि अध्ययन गर्न थप सहजता थपेको बताएका हुन् ।