फागुनमा बागमती साहित्यिक महोत्सव धादिङमा हुने

धादिङ– धादिङबेसीमा बागमती साहित्यिक महोत्सव २०८१ फागुन १६ र १७ गते हुने भएको छ ।

Advertisement

शुक्रबार कर्मचारी मिलन केन्द्र धादिङका अध्यक्ष विष्णु प्रसाद आचार्यको अध्यक्षतामा बसेको बैठकले महोत्सव आगामी फागुन १६ र १७ गते धादिङबेसीमा आयोजना गर्ने निर्णय गरेको हो ।
स्थानीय साहित्य र सांस्कृतिक गतिविधिहरूलाई प्रोत्साहन गर्न, साहित्यकारहरूको सिर्जनात्मक कार्यलाई सम्मान गर्ने उद्देश्यले महोत्सव आयोजना गर्न लागिएको आचार्यले बताए ।

बैठकले महोत्सवलाई सफल र भव्य रूपमा सञ्चालन गर्नका लागि कर्मचारी मिलन केन्द्रका अध्यक्ष विष्णुप्रसाद आचार्यकाे संयाेजकत्वमा मुल संयोजन समिति गठन गरेको छ । संयाेजन समितिको सदस्यहरूमा प्रकाश पौडेल, गायत्री खतिवडा, सिताराम अधिकारी, डाक्टर नविन बन्धु पहाडी, देवी प्रसाद अधिकारी र लालकाजी श्रेष्ठ रहेका छन् ।

बागमती साहित्यिक महोत्सवले साहित्य क्षेत्रमा नयाँ आयाम थप्ने अपेक्षा साथै स्थानीय समुदायका बीच सन्देश प्रवाह गर्ने, सांस्कृतिक र सामाजिक एकता प्रवर्धन गर्ने, पठन संस्कृतिकाे विकास गराउने, युवा पुस्तामा साहित्यिक चेतना फैलाउने कार्यमा पनि महत्त्वपूर्ण भूमिका खेल्ने विश्वास गरिएको अध्यक्ष आचार्यले बताए ।