डिभोर्सले पनि नरित्तिएको एलिनाको माया

काठमाडौं- चर्चित गायिका एलिना चौहानको सम्बन्ध विच्छेद(डिभोर्स) भएको छ। विवाह गरेको एक वर्ष नपुग्दै एलिनाले पति विष्णु सापकोटासङ्ग डिभोर्स गरेकी हुन् ।

Advertisement

एलिनाले गत बैशाख ५ गते बागलुङ निवासी विष्णु सापकोटासँग विवाह गरेकी थिइन् । एलिनाले सम्बन्ध विच्छेद गर्दा ‘माना चामल’ र ‘अंश’को दाबी गरिनन्। पतिले अनेक शंकाउपशंका गरेको, चरित्रमाथि प्रश्न उठाएको लगायतका कारणले उनले डिभोर्स दिएकी हुन् ।

मंगलबार जिल्ला अदालत काठमाडौंले मुद्दाको छिनोफानो गरेको छ। तर विष्णु सापकोटासँगको सम्बन्धविच्छेद पछि एलिनाले सामाजिक सञ्जाल फेसबुकमा भावुक स्ट्याटस लेखेकी छिन् ।उनले सामाजिक संजाल फेसबुकमा पति विष्णुलाई ‘प्रिय विष्णु’ भनेर सम्बोधन गरेकी छिन् ।

उनले विवाह गर्दा लिएको ७ फेरा, चुरा, सिन्दूर, लगनगाँठो, विवाह दर्ता सबै उस्तै रहेको बताएकी छिन् । शारीरिक मिलन मात्रै विवाह नहुने रहेछ भन्दै भावनात्मक मिलन, आपसी विश्वास र समझदारी नै विवाहको मुख्य प्राण रहेको उल्लेख गरेकी छिन् ।

उनले आफ्नो सम्बन्धमा अल्पायु मै पूर्णविराम लागेको भन्दै आजदेखि स्वतन्त्र भएर कानुनी रूपमै आ–आफ्नो गन्तव्य तय गर्न बाटो खुलेको बताएकी छन् । उनले पत्नीका रुपमा अधिकारले पाउने सम्पत्ति सबै विष्णु सापकोटालाई नै प्रगति र उन्नतिका लागि छोडेको बताएकी छिन् । अन्त्यमा उनले विष्णुलाई बाँकी जीवनको लागि शुभकामना समेत दिएकी छन् । ।

डिभोर्सपछि एलिना चौहानको भावुक स्ट्याटस जस्ताको तस्तै:

प्रिय बिष्णु,
अग्निलाई साक्षी राखेर ७ फेरा लगाउदा गलेका खुट्टाहरु अझै उस्तै छन्।
तिम्रो हातले रंगिएको मेरो सिउदो अनि सिन्दुरका डोबहरु अझै उस्तै छन्।
तिम्रा नाममा लगाएका हातभरिका चुरा अनि छिनछिन आवाज अझै उस्तै छन्।
हामीलाई दुईबाट एक बनाएको सेतो लगनको गाँठो अझै उस्तै छ।
वडा कार्यालयमा गएर बनाएको हाम्रो विवाहदर्ताको प्रमाणपत्र अझै उस्तै नयाँ छ।
तर फेरा, चुरा, सिन्दुर, लगनगाँठो, विवाहदर्ता र शारीरिक मिलन मात्रै विवाह होईन रहेछ।
भावनात्मक मिलन, आपसी विश्वास र समझदारी नै विवाहको मुख्य प्राण रहेछ।
जुन रहेन अनि हाम्रो सम्बन्धमा अल्पायु मै पुर्णविराम लागेको छ। यो रहरले होईन। जुन बाध्यता तिमि, मलाई र भगवानलाई मात्र थाहा छ।
आजदेखी स्वतन्त्र भएर कानुनी रुपमै आ-आफ्नो गन्तव्य तय गर्न बाटो खुलेको छ।
पत्नीका रुपमा अधिकारले मैले पाउने सम्पत्ति तिम्रै प्रगति र उन्नतिका लागि छोडेको छु।
तिमीलाई बाँकी जीवनको धेरै धेरै शुभकामना बिष्णु।