उत्तरी धादिङका स्थानीयलाई गाउँपालिका तहको योजना तर्जुमा प्रक्रियासम्बन्धि तालिम

धादिङ- खनियाँबास गाउँपालिका र गंगाजमुना गाउँपालिकाका स्थानीयलाई गाउँपालिका योजना तर्जुमा प्रक्रिया सम्बन्धि २ दिने तालिम दिइएको छ । कृषक समुहका अगुवाहरूलाई गाउँपालिकाको योजना तर्जुमा प्रक्रियामा प्रभावकारी भूमिका खेल्न सक्षम बनाउने र समुदाय तहमा नेतृत्व विकास गर्ने उद्देश्यले २ दिने तालिमको आयोजना गरिएको हो ।

Advertisement

झार्लाङमा भएको तालिममा १६ वटा कृषक समुहका अगुवा, ३ लैगिक च्याम्पियनहरु सहित २५ जना र तावलमा भएको तालिमबाट १८ जना लाभान्वित भएका छन् । प्रयास नेपाल धादिङले आड्रा नेपालको साझेदारीतामा खनियावासमा र गंगाजमुना गाउँपालिकामा संचालित रिलिफ परियोजनाको सहयोगमा तालिम सम्पन्न गरेको हो । परियोजनाको सहजिकरणमा गठन तथा पुर्नगठन भएका कृषक समुहका ११ जना समुदायका अगुवा कृषकहरुको लागि गाउँपालिका योजना तर्जुमा प्रक्रिया सम्बन्धि विषयमा तालिम संचालन भएको हो ।

गाउँपालिकाको नीति तथा बजेट निर्माण प्रक्रियामा समुदायको संलग्नताको महत्व, योजना तर्जुमा प्रक्रिया र ७ चरणहरू, योजना तर्जुमामा टोलबस्ती तथा समुदायको भूमिका र समावेशी सहभागिता, वडा तथा पालिका तहमा योजना माग गर्ने प्रक्रिया निवेदन तथा प्रस्तावनाको ढाँचा आवश्यक कागजातहरु लगायतका विषयमा सहजिकरण गरिएको थियो ।

योजना माग निवेदन, समूहको योजना माग निर्णय, प्रस्तावना तयारी, कार्यान्वयन, अनुगमन, तथा मूल्यांकन र योजना सम्झौता,र फरपारक गर्दा पेश गर्नु पर्ने आवश्यक कागजातहरु, र पेशगर्ने समय, स्थानीय स्रोत परिचालन र सहकार्य लगायतका वियषबस्तुमा खनियावास गाउँपालिकाका वडा नं २ का सचिव अशोकबाबू श्रेष्ठ र प्रयास नेपाल धादिङका पशु प्राविधिक रुपेश तामाङ र गंगाजमुनामा गाउँपालिकामा गंगाजमुना गाउँपालिकाका बरिष्ट सहायक युवराज थपलियाले सहजिकरण गरेको झार्लाङबाट प्रयास नेपाल धादिङका सामुदायिक सहजकर्ता मनिष तामाङले जानकारी दिए ।